Куштылго огыл пÿрымашан, «художество» деч тораште шогышо айдемын трук оҥай талантше почылтын. Ик идалыкат пелыште Анна Васильевна 300 утла сÿретым сÿретлен.
Очыни, кажныналанн шочмо годсек композицийым да тÿсым шижын моштымаш пуалтеш, но тудым кучылт огына мошто, сандене тудо вашке йöрталтеш. Жапыштыже вияҥдаш огыл гын, колын моштымо денат тыгак лиеш. Художественно шкем почаш профессионал-влакын веле огыл йöнышт уло манын, южгунамже шкаланна каласаш лÿдына, но тидыже пашам йöратымым да пеҥгыдылыкым йодеш, вет лектышыже вигак шинчалан огеш кой. Тыге куштылгырак сомылым ойырена да тиде мыланна огеш кÿл манын ойлена...
Анна Васильевна, шке ийготшым да врач-влакын приговорыштым шотыш налде, пиалан лияш вийым муын. Тудлан изишак пиал шыргыжалын: лач ты жапыште 85 ияш ÿдырамаш Костромашке шке шешкыже, палыме сÿретче Ирина Соглачаева, деке илаш куснен. Сÿретче-влак коклашке логалмеке, тудо сымыктыш дене альбом-влакым ончаш, сÿретче-влак нерген лудаш тÿҥалын. Да фломастер-влакым кидыш налын.
Ирина «ковалан» палыме украин мастар Мария Примаченкон да кологривский йомакче Ефим Честняковын творчествыштым шекланаш темлен. Коктынат тудын чонжылан лишыл лийыныт. Анна Васильевна нунын гай, но шкеж семын сÿретлаш тÿҥалын. «Наивный» сымыктыш трук «кÿкшö» лийын.
Анна Суворова тений 90 ияш лÿмгечыжым палемда ыле, но 2013 ий февральыште илыш гыч шып каен. Анна Васильевна 1924 ийыште Ленинград область Волхово районысо Потанино ялеш шочын. 1941 ийыште шке кумылын фронтыш каен: Ленинград воктенсе эвакогоспитальыште санитаркылан ыштен. Вара тылыште тыршен - Киров олан шине заводлаштыже.
2012 ий декабрьыште Кострома оласе муниципальный художественный галерейыште Анна Васильевна Суворован «Весела фломастер-влак, але Шоҥгылык деч эм» персональный выставкыже почылтын.
Йошкар-Оласе Калык-прикладной сымыктыш тоштерыште Анна Васильевнан изирак ужаш пашаже-влакым гына ончыктымо, но тиде мини-выствкат авторын творчествыж, илышым йöратымыж да кеч-могай ийготыштат шонымаш шукталт кертме нерген шуко ойла.
«Кугарня» газетын ответственный секретарьже Ирина Золотарева